Manukar Radiu

Manukar Radiu

dok

Ilustrasi Palui

Baca Juga

• Akuarium Timpakul


• Bakas Igutan


• Bisikan Gaib


• Makan Gaji Buta


• Abdi Negara


• Talanjur Basah

BIAR mintuha Palui itu sugih banyak baisian pahumaan tapi urangnya udik banar wan buta huruf. Kada lawas tadi sidin bailang sakaligus bamalam sahari-dua di rumah Palui.

Lui, aku mainta tulung wan ikam. Ikam isuk dangani aku ka pasar satumat, aku handak manukar radiu, ujar mintuhanya.

Kanapa sampiyan handak manukar radiu Bah, maka sampiyan sudah ada baisian tivi di rumah? ujar Palui batakun.

Aku munyak malihat tivi karna sabarataan acaranya sinetrun tarus, kada siang kada malam. Kada kawa lagi mandangar barita, ujar mintuha Palui gagarunum.

Isuknya tulak ai Palui wan mintuhanya ka pasar. Sampai di tuku urang bajual barang eliktrunik lalu masukkan bubuhannya badua.

Napa nang kawa ulun tulungi pakacil? ujar nang ampun tuku manakuni mintuha Palui.

Aku handak manukar radiu Suni, ujar mintuhanya Palui.

Kalu nang radiunya haja, kami kada baisian nang mirik Suni. Kalu nang Suni itu langkap radiu, tip wan pisidinya, ujar urang itu pulang.

Sabaiknya mirik lain haja bah ai ada nang ukurannya tahalus jadi pian nyaman mambawa bulik, salain itu haraganya tamurah, ujar Palui manyaranakan.

Kada, aku handak nang radiu Suni jua. Sual haraga aku kada jadi masalah, nang panting ujar urang bunyinya bagus, ujar mintuha Palui pulang.

Cuba ikam tes dahulu, aku handak mandangar bunyinya, ujar mintuha Palui.

Kalu radiu Suni ini dijamin bagus pakacil ai. Pian kada cagar manyasal, ujar ampun tuku sambil maungkai ka kutak lalu manyucuk listriknya.

Dicubainya mamutar kaset bagus haja, lalu dicubanya pulang pakai pisidi, bagus haja jua. Mintuha Palui kahimungan sambil baanggut-anggut mandangar suara musik.

Cubai radiunya pulang! ujar mintuha Palui manyuruh mamutar radiunya. Pas dibunyiakan kaluar suara: Inilah Radio Republik Indonesia, mengudara pada..., ujar suara di radiu.

Hadang dahulu, hadang dahulu, ikam handak mambunguli aku kah? ujar mintuha Palui bakakajutan sarik.

Ujar ikam tadi radiu ini radiu Suni, sakalinya imbah diputar katahuan bahwa radiu nang ikam jual ini radiu Republik Indonesia. Pukuknya aku kada handak nang ini, aku minta hurupakan lawan nang bujur-bujur radiu Suni, ujar sidin bamamai.

Nang ampun tuku sawat bingung malihat kalakuan mintuha Palui.

Tapi imbah mancangangi Palui nang badiri di belakang mintuhanya, hanyar inya lihum karna Palui mahahulut mintuhanya mamadahakan sidin miring alias kada tapi waras. (rep)

more info...